Jekh la Slovakijakra themeskro antiromano avri diňipen sas oda, hoj pen zathovenas perzekučna lagri. Pro anglal oda sas buťakre lagri. Prekal e Slovakijakra themeskri existencia sas ola lagri andro sako Slovakijakro regionos. Pal e formalno sera sas ola lagri prekal o asocijalna manuša, no oda sas imar ajsi kamuflaža prekal e Romengri internacija, save andro lagri sakovar sas ki o jepaš savore manušendar. Andro buťakre tabora denas le terne romane muršen, save musaj sas te kerel ola maj phareder manualna buťa, kaj pes ačhavenas o fali prekal o leňa, droma, phurda the o štreki. O Roma andro buťakre tabora kerenas sako ďives 11 ori u chudenas minimalno poťiňiben. Sas avka nakuč buťakri zor, savi andro maj phareder situacija ačhavenas but kamle ačhavibena andre sasti Slovakija. Oda, hoj o buťakre tabora sas antiromane, diťhol the olestar, hoj o Roma bešenas andro špecijalna ubikaciji ča prekal o Roma u lengri evidencija sas duplicitno. E kiko kartoteka sas diňi prekal o Roma u e sivo kartoteka prekal savore aver džene. Majbareder pes oda sikhavelas, kana pes o buťakre lagri rozmukhenas. Na romane manušen automatikanes mukhenas khere, no le Romen ča prethovenas andro aver lagri.

Jekhta buťakre lagri andre Slovakija sas imar andro 1941 berš. Ačhade len andre Očova, Most na Ostrove the andre Horarňa Trnavate. Lengri existencija na sas dinďarďi, mekh andro 1941 berš sas rozmukhle. Stabilneder buťakre lagri avenas andro 1942 berš. Maj bareder sas o buťakro lagros Dubnicate opral o Vahos ( 1942 – 1944) the o buťakre lagri andre angluňi Slovakija 1942 – 1943). Dubnicate opral o Vahos kerenas o berteňoša maj trin berš, kaj ačhavenas ačhaviben pro paňi. Andre angluňi Slovakija ačhiľas jekh buťakre lagrengro komplexos Hanušovcate opral e Topľa, Bystrate, pro Petičis the andro Ňižno Hrabovcis. O Roma andre angluňi Slovakija ačhavenas e o štrekakro drom Perješistar dži o Strážske.

Tel o ekonomikano rajipen Hanušovcate opral e Topľa perelas tele the buťakro lagros Jarabate 1942, kaj o berteňoša ačhavenas o themutno drom Čertovicatar - Myto tel o Ďumbier. Cikneder buťakro lagros sas andro 1943 berš phundrado Ilavate. Leskri orientacija sas te agorinel o buťa pro paňakre ačhavibena. Andro berša 1943 – 1944 sas aktivno buťakro lagros Revucate. Leskre manuša ačhavenas e štreka pro kotor Revúca - Tisovec. Agorutno bareder buťakro lagros sas o Usti opral e Orava. O romane murša adaj kerenas pro jekh maj bareder the maj kamleder ačhaviben andre Slovakija – pre Oravsko priehrada. O buťakro lagros kerelas andro 1944 berš, u rozmukhle les andro agorutno ďives ole beršeste. Oleha pes andre phandľas buťakre lagrengri existencija. Na agorinďas mekh le Romengro tiripen, the lengri koncentracija andro perzekučna lagri. Ipen visara.